స్వర సాంగత్యం

elanaga

ఇసుక తిన్నెల మీంచి గుసగుసల్ని మోసుకొస్తూ

గుండె లోపలికి దూరుతుందొక రాగం

వేలి కొసను పట్టుకుని వేల మైళ్ల దూరం

లాక్కుపోతుంది లయతో –

గాలిలో గంధమాధుర్యాన్ని నింపి

వీనులకు విందు చేస్తుంది

పూర్వజన్మల పురా వైభవాల అపూర్వ సమ్మేళనాన్ని

పూస్తుంది మనసుగోడల మీద మందంగా –

సొంపును పులుముకున్న ఇంపైన రాగాన్నాస్వాదించి

సోలిపోతుంది పులకాంకితమైన ఆత్మ

నాదవృష్టిలో తడిసి పుట్టిన మోదం

ఖేదానికి వీడ్కోలు పాడుతుంది

స్వరలయల మెట్ల మీదుగా

స్వర్గసౌధానికి దారి మొలుస్తుంది

 

రాగం ఆవహించినంత సేపూ

రంజకత్వం మేఘమై ఊగుతూనే వుంటుంది

హృదయపు పొదరిల్లు మీద –

గానం ఆగిన తక్షణమే

గాయపు నొప్పికి జన్మ

నరాలు స్వరాల కోసం తపిస్తూ

నరకాన్ని తలపించే వేదనకు శంకుస్థాపన

 

గానం తోడు లేని జీవన ప్రస్థానం

ప్రాణం లేని మనుగడకు సమానం

 

*****

–    ఎలనాగ

 

Download PDF

10 Comments

  • స్వాతీ శ్రీపాద says:

    ఇసుక తిన్నెల మీంచి గుసగుసల్ని మోసుకొస్తూ

    గుండె లోపలికి దూరుతుందొక రాగం

    వేలి కొసను పట్టుకుని వేల మైళ్ల దూరం

    లాక్కుపోతుంది లయతో -చాలా బాగుంది

  • ns murty says:

    రాగసుధామధురంగా ఉంది ఎలనాగ గారూ మీ స్వర సాంగత్యం. “జీవనంబు తనకు జీవనంబైయుంట” మకరి అలసిపోలేదనీ, కరి అలిసిపోయిందనీ అంటాడు పోతన గారు గజేంద్రమోక్షం కథలో. ఆ తడి ప్రభావం అలాంటిది.

    ఆ తడి దానికెలాటిదో, ఈ స్వరాల తడి కూడా మానవ జీవితానికి అలాంటిదే.
    అభివాదములతో

  • Ravi says:

    ఎలనాగ గారు,

    పోయెమ్ చాలా బాగా వచ్చింది.

    “వేలి కొసను పట్టుకుని వేల మైళ్ల దూరం లాక్కుపోతుంది” నచ్చింది.

    అభినందనలు,

    రవి వీరెల్లి.

  • Elanaaga says:

    స్వాతీ శ్రీపాద గారూ, నౌడూరి మూర్తి గారూ, రవి వీరెల్లి గారూ!

    నా కవిత మీకు నచ్చినందుకు సంతోషంగా వుంది. మీ ముగ్గురికీ
    నా కృతజ్ఞతలు.

    • enugu narasimha reddy says:

      గానం తోడులేని జీవం నిజంగా అసంపూర్ణమే. చాలా బాగా చెప్పారు ఏలనగా గారు, కంగ్రాట్స్.- ఏనుగు నరసింహ రెడ్డి

  • Mercy Margaret says:

    బ్యూటిఫుల్ పోయెమ్ సర్ ..

  • Rammohan Thummuri says:

    నాద వృష్టిలో తడిసిపుట్టిన మోదం
    ఖేదానికి వీడ్కోలు పాడుతుంది
    చాల బాగా వచ్చింది పోయెం

  • Elanaaga says:

    రామ్మోహన్ గారూ!

    పొయెం మీకు నచ్చినందుకు సంతోషం, కృతజ్ఞతలు.

ఒక వ్యాఖ్యను

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Enable Google Transliteration.(To type in English, press Ctrl+g)