“A thing of beauty is a joy for ever:
Its lovliness increases; it will never
Pass into nothingness; but still will keep
A bower quiet for us, and a sleep
Full of sweet dreams, and health, and quiet breathing.. “
అన్నాడు “కీట్స్” మహాశయుడు “Endymion” అనే మహాకావ్యంలో!
ఈ వాక్యాల్లోంచే “అందమే ఆనందం ఆనందమే జీవితమకరందం” అనే పల్లవి వచ్చి ఉంటుందని నా ఊహ.
అదే కీట్స్ “Ode on a Grecian Urn” అనే కవితలో
“Beauty is truth, truth beauty,” that is all
Ye know on earth, and all ye need to know..”
అని కూడా అన్నాడు. అయితే ఈ వాక్యాలను గురించి విమర్శకుల మధ్య చాలా చర్చ జరిగింది.
ఆ చర్చ సంగతి వదిలేస్తే, అసలు అందాన్ని చూసి ఆనందించనివారెవ్వరు? ప్రపంచంలో, ప్రకృతిలోనూ, మనుషుల్లో, మనసుల్లో, మమతల్లో ఎక్కడైనా సరే అందాన్ని భౌతికంగానో అంతర్గతంగానో చూసినప్పుడు తెలియని ఆనందంతో మనసు నిండిపోతుంది. ఎవరి హృదయానికి ఎటువంటి ఆనందం(భౌతికమైనదా, అంతర్గతమైనదా అన్నది) కావాలన్నది వారి వారి మనస్తత్వాలను బట్టి ఉంటుంది.
మనిషి కోరిక ఎటువంటిదైనా దానికి చిట్టచివరి కొన ఆనందమే కదా! ఆ ఆనందం “అందం ద్వారా కూడా మనిషికి చేరువవగలదు. అందమైన పరిసరాలను చూసి ప్రకృతారాధకులు ఆనందపడితే, ప్రేయసీప్రియులు తమతమ ప్రియతముల అందచందాలను చూసి ముచ్చటపడతారు. తల్లిదండ్రులు తమ చిన్నారుల ముద్దులొలికే సుందరాకారానికి ముగ్ధులైతే, భక్తులు తమ ఇష్టదైవాల సౌందర్యాకృతులకూ, గుణగణాలకూ దాసోహమంటారు.
మరి ఆ అందాన్ని గురించి మన సినీకవులెటువంటి వర్ణనలు చేసారో వినేద్దామా…
1) అందం పై సినీగీతాలనగానే పైన చెప్పుకున్న బ్రతుకుతెరువు చిత్రం లోని “అందమే ఆనందం..” పాటే గుర్తుకు వస్తుంది. ఈ పాట పల్లవి ఒక ఆంగ్ల పద్యాన్ని గుర్తుకు తెస్తే, చివరి వాక్యం “all the world’s a stage” అని షేక్స్పియర్ రాసిన వాక్యాలను గుర్తుకుతెస్తుంది. వీటి సంగతి ఎలా ఉన్నా పాట ఆద్యంతం మధురమైన సాహిత్యాన్ని అందించారు సముద్రాల రామానుజాచార్యులు. ఇదే పల్లవితో కొద్దిపాటి సాహిత్యపు మార్పులతో పి.లీల పాడిన పాట కూడా వినసొంపుగా ఉంటుంది. ఘంటసాల ,పి.లీల పాడిన ఈ రెండు గీతాలను క్రింద లింక్ లో పక్కపక్కనే వినవచ్చు:
2) “భలే భలే అందాలు సృష్టించావు.. ఇలా మురిపించావు ” అంటూ అందమైన ప్రపంచాన్ని, ప్రకృతినీ సృష్టించిన భగవంతుడికి కృతజ్ఞతలు చెప్తూ, మానవతావిలువలను మరచిపోయి మృగంలా మారిపోతున్న మానవుణ్ణి మార్చమని కోరుకుంటాడు గాయకుడు ఈ పాటలో. ప్రకృతి నుండీ, పశుపక్ష్యాదుల నుండి మానవుడు నేర్చుకోవాల్సిన నీతిని గురించి తెలిపే ఈ పాట భక్త తుకారాం చిత్రం లోనిది.
3) ” అందాల రాముడు ఇందీవర శ్యాముడు
ఇనకులాబ్ది సోముడు ఎందువలన దేవుడు..”
అంటూ సాగే ఈ పాటలో శ్రీరాముడి మనోహరమైన రూపవర్ణన చేస్తూ, ఏ గుణగణాల వలన ఆయన దేవుడయ్యాడో, రాముడు ఎందువలన ఉత్తమ పురుషుడుగా నిలిచాడో తెలుపుతుంది గాయని. “ఇన్సాఫ్ కీ డగర్ పే బచ్చోం దిఖావో చల్ కే” అనే హిందీ పాట లోని ఇంటర్ల్యూడ్(బి.జి.ఎం)లో వచ్చే వాద్యసంగీతం ఈ పాటలో చరణాంతర కోరస్ గా రూపుదిద్దుకుంది. “ఉయ్యాల జంపాల” చిత్రంలోని ఈ పాట
4) ” అందాల పసిపాపా.. అన్నయ్యకు కనుపాప
బజ్జోవే బుజ్జాయీ నేనున్నది నీ కొరకే
నీకన్నా నాకెవరే.. ” అంటూ చెల్లెలికి జడ వేసి, ఆటలాడుతూ, ఆమె ఉన్నతిని కోరుతూ జోలపాడతాడొక అన్నయ్య. ఇలాంటి అన్నయ్య ఉంటే ఇంకేం కావాలి అనిపిస్తుందీ పాట చూస్తే. ముద్దులొలికే ఆ ఒంటరి పసి పిల్లలను చూస్తే జాలి కూడా కలుగుతుంది. అన్నాచెల్లెళ్ల అందమైన అనుబంధానికి ప్రతీకనిపించే ఈ ముచ్చటైన గీతం “చిట్టిచెల్లెలు” చిత్రం లోది.
5) ” అందంలో పందెమేస్తా అందర్నీ ఓడిస్తా ” అంటూ భానుమతి గారి స్వరం ఖంగుమంటూ సవాలు విసురుతుంది. ” అబలంటే మోజులా?” అని నిలదీస్తూ తన దగ్గర ఆకతాయిల ఆటలేవీ సాగవని హెచ్చరిస్తుంది గాయని ఈ పాటలో. “ఆలీబాబా 40 దొంగలు” చిత్రంలోని ఈ పాటకు సుసర్ల దక్షిణామూర్తి సంగీతం సమకూర్చారు.
క్రింద లింక్ లోని వరుసలో మొదటి పాట:
6) తమ ప్రేమకు ఎదురైన అడ్డుతెరలు తొలగి ఒకటవబోతున్నామన్న ఆనందంతో “అందాలు తొంగిచూసే..హా… ఆనందం ఈల వేసే..రా..” అంటూ రెండు ప్రేమ జంటలు ఆనందంతో ముచ్చటగా పాడుకుంటాయి. చూస్తున్నంతసేపు నవ్వుల పువ్వులు పూయించే హాస్యరస ప్రధానమైన “ప్రేమించి చూడు” చిత్రంలోని పాట ఇది.
7) “నీలో విరిసిన అందాలన్నీ నాలో వీడని బంధాలాయే ” అంటూ అమ్మడి అందాలకు తానెలా వశమైపోయాడో తెలుపుతాడో ప్రియుడు.
“నీలో పలికిన రాగాలన్నీ నాలో శ్రావణమేఘాలాయే” అంటూ తన ఆనందాతిశయాలను తెలియచేస్తుందాతని ప్రియురాలు.
“ఆ కోరికలే ఇద్దరిలోనా కార్తీకపూర్ణిమలై వెలగాలి..” అంటూ తమ బంధం ఏడేడు జన్మల బంధమై నిలవాలని తహతహలాడతారిద్దరూ!
“మనుషులు మట్టిబొమ్మలు” చిత్రంలోని ఈ చక్కని పాట క్రింద లింక్ లో వినేయండి..
8) “అందాల బొమ్మతో ఆటాడవా
పసందైన ఈ రేయి నీదోయి స్వామి” అంటూ తన జావళీతో కవ్విస్తుందో నాయిక.
“చల్లగాలితో కబురంపితిని చందమామలో వెదకితినోయి
తార తారను అడిగితినోయీ” అంటూ ప్రియుని కోసం ఎంతగా ఎదురుచూసిందో, ఎంతగా వెతుకులాడిందో తెలుపుతూ సాగే ఈ జావళీ ” అమరశిల్పిజక్కన్న” చిత్రం లోది. చంపకు చారడేసి కన్నులతో బి.సరోజాదేవి ప్రేక్షకులను గారడీ చేస్తుంది.
9) ప్రియుడి రూపలావణ్యాలు చందమామ కన్నా మిన్నవంటూ అతగాడిని పొగడ్తలతో ముంచెత్తుతూ మురిసిపోతుందో అందమైన ఇంతి. ఇంటి గుమ్మంలో నిలబడి “అందచందాల సొగసరివాడు విందు భోంచేయవస్తాడు నేడు ” అంటూ భోజనానికి పిలిచిన ప్రియుడి కోసం ఎదురుచూస్తూ గానం చేస్తుంది.
మెచ్చవలసింది పాటలోని సాహిత్యాన్నో, అందాల చందమామనో, తెరపై కనబడే అమ్మడినో, ఆమె మెచ్చే ప్రియుడినో తేల్చుకోలేకపోతాం మనం.
అంత చక్కని ఈ పాట “దొంగరాముడు” సినిమా లోది.
10) సినిమాకథా అదీ తెలీకపోయినా చిన్నప్పుడు రేడియోలో వినేప్పటి నుండీ ఈ పాట బాగా నచ్చుతుంది నాకు. ఎం.ఎస్ .విశ్వనాథన్ అందించిన సంగీతం, ఎస్.జానకి గళం రెండూ వేటికవే అన్నట్లుంటాయి. ఆత్రేయ రచన గురించి చెప్పేదేముంది..
“అందమైన లోకమని రంగురంగులుంటాయని
అందరూ అంటూంటారు రామ రామ
అంత అందమైంది కానే కాదు చెల్లెమ్మా..
చెల్లెమ్మా..అందమైంది కానే కాదు” అంటూ లోకం పోకడని ఎంతో సమమైన ఉపమానాలతో తెలియపరుస్తుంది గాయని.
“ఆశలకు అంతముందా “
“గడ్డిమేసి ఆవు పాలిస్తుంది పాలుతాగి మనిషి విషమౌతాడు
అది గడ్డి గొప్పతనమా? ఇది పాల దోషగుణమా?”
“లోకమంతా ఇదే తీరు పిచ్చమ్మా..”
“డబ్బు పుట్టి మనిషి చచ్చాడమ్మా పేదవాడు నాడే పుట్టాడమ్మా
ఆ ఉన్నవాడు తినడు ఈ పేదని తిననివ్వడు
కళ్ళు లేని భాగ్యశాలి నువ్వమ్మా
ఈ లోకం కుళ్ళు నువ్వు చూడలేవు..”
మొదలైన వాక్యాల్లో లోకంలోని కల్మషాలన్నింటినీ క్లుప్తంగా కళ్లముందు ఉంచుతారు ఆత్రేయ..!
“తొలి కోడి కూసింది” చిత్రం లోని పాటని క్రింద లింక్ లో వినవచ్చు..
***
“అందం” పై మరి కొన్ని సినీ గీతాలు:
“అందమైనతీగెకు పందిరుంటే చాలును
పైకి పైకి పాకుతుంది చినదానా
పరవశించి సాగుతుంది చినదానా”
(భార్యాబిడ్డలు)
“ఆనందతాండవమే ఆడెనుగా ఆ శివుడు అనాదిగా
అదే నేను చేస్తున్నా ఏడవకండి..”
అందమైన అనుభవం..
“అందమైన అనుభవం..” ( title song) ఒఠ్ఠి స్వరం + ఈ మాటలతో చిత్రంగా ఉంటుందీ పాట..
“అందములు విందులయే అవని ఇదేగా
కమలాసనుని కోటిశిల్ప కూటమిదేగా
ఎందును లేని తీయందనాలు చిందులు వేసేనుగా”
(భూకైలాస్)
“అందమంటే నువ్వే
ఆనందమంటే నువ్వే
నువ్వంటే నువ్వే
నీవంటిది నువ్వే నువ్వే “
(ఇల్లాలు)
http://www.sakhiyaa.com/
ప్రతి అందం జంట కోసం పలవరించిపోతుంది
(ఊర్వశి)
“అందమంతా నాదే చందమంతా నాదే
ఇంక సుందరాంగులందు రాణి నేనే గదే”
(పెద్దరికాలు)
(8th song in the link)
“అందాల ఆనందం ఇందేనయ్యా
అందం చూడవయ్యా ఆనందించవయ్యా”
(దేవదాసు)
“అందానికి అందం నేనే జీవన మకరందం నేనే
తీవెకు పూవుని నేనే పూవుకి తావిని నేనే”
(చివరికి మిగిలేది)
“అందం ఉరికింది వయసుతో పందెం వేసింది
మనసులో బందీ అయ్యింది ఇదే మీ బంధం అంటోంది”
(బంగారు సంకెళ్ళు)
“ఆహా అందము చిందే హృదయకమలం అందుకునే రాజొకడే”
(ఆడబ్రతుకు)
“అందమైన జీవితము అద్దాల సౌధము
చిన్న తప్పు చేసినా ముక్కలై మిగులును”
(విచిత్ర బంధం)
“అందమైన లోకముంది అనుభవించు కాలముంది.. “
(అందమైన అనుభవం)
మళ్ళీసారి మరో నేపథ్యంతో కలుద్దాం…
తృష్ణ
