కొన్ని కొన్నిసార్లు
ఆగిన గడియారాల గురించి
తాళం వేసి పోగొట్టుకున్న చెవి గురించి
చీకటిలోని జిగేల్మనే వెలుగు గురించి
వెలుగులోని చిమ్మన్ చీకటి గురించి
మాట్లాడుకుంటాం కొట్లాడుకుంటాం
తండ్లాడుతుంటాం
తల్లడిల్లిపోతుంటాం
ఒక్కొక్కసారి
ఇల్లూ ముంగిలీ పిల్లల గురించున్నూ
కొన్నిసార్లు మనసు పెట్టి
కొన్నిసార్లుమ మనసున పట్టి
ఒకరిలోకి ఒకరు ప్రయాణించీ
ఇంకొకరిలోకి ఒకరు ప్రవేశించీ
కొన్ని రహస్య ప్రదేశాల్లో కొన్ని ఆశలతో
కొన్ని సంకేత స్థలాల్లో బోలెడు కాంక్షలతో
విశాల నీలాకాశం పందిరి కింద
దు:ఖ దు:ఖంగా
నిశ్శబ్ధంగా మౌనంగా
క్షామ శరీర క్షేమం కోసం
చలి వేకువలో మంటల్ని రాజేసినట్టు
రాత్రి కలల్ని కాజేసినట్టు
ఎడారి పెదవులకు
నవ్వును పువ్వు కానుకగా
సమర్పించడానికి గుసగుసగా మాట్లాడుతూనే ఉంటాం
సలంద్రి బాయి నుంచి
కిన్లే వాటర్బాటిల్ దాకా
కాలిబాట నుంచి
ఫోర్లైన్స్ రోడ్డుదాకా
ఎన్ని గెలుపోటములు
ఎన్నెన్ని మలుపులు
మరెన్నో తలపోతలుగా మాట్లాడుకుంటూనే ఉంటాం
ఒక మర్మ కర్మ స్పర్శ కోసం
కొన్ని జీవిత కాలాలపాటు…
– జూకంటి జగన్నాథం