అలుక కతమును తెలుపవు..?

radha-in-viraha
“ఘాటైన ప్రేమకు అసూయ ధర్మామీటర్ లాంటిది” అయితే, ఆ ప్రేమ లోతు ఎంతుందో తెలిపేది అలుకే మరి!
ఎందుకంటే ఎవరిమీదైనా అలిగినప్పుడే కదా అవతలివారి ఓపిక, సహనం ఏపాటివో తెలిసేది. స్నేహితులైనా, ప్రేమికులైనా, తల్లీపిల్లలయినా, భార్యాభర్తలయినా, చివరికి కొత్తల్లుడయినా సరే అలకపాన్పు ఎక్కగానే విసుక్కోకుండా బ్రతిమాలి, బుజ్జగించి అలక తీర్చి తిరిగి మచ్చిక చేసుకోవడంలోనే అలుకతీర్చేవారి ఓర్పు, నేర్పూ దాగి ఉంటుంది. అలుక కోపానికి చెల్లెలే అయినా గుణగణాల్లో మాత్రం పూర్తిగా భిన్నం. అడక్కుండా వచ్చేది కోపమైతే, కావాలని తెచ్చిపెట్టుకునేది అలుక. ఇదీ సరససల్లాపాల్లో ఉపయుక్తమైనది. కోపం దూరాన్ని పెంచితే, అలుక విరహాన్ని పెంచి మనసుల్ని దగ్గర చేస్తుంది. మరి మన సినీకవులు అలిగినవారి మీదా, అలుకలు తీరినవారి మీదా, అలుక తీర్చేవారి మీదా ఎటువంటి పాటలల్లారో తెలుసుకుందామా…
“ఉరుములు మెరుపులు ఊరుకే రావులే
వానజల్లు పడునులే మనసు చల్లబడునులే”
అంటూ  ఓ అమ్మాయి పాడితే దిగిరాని అబ్బాయి ఉంటాడా? అలుకెందుకో తెలియకపోయినా, దానికి తగిన కారణమేదో ఉండే ఉంటుందని అర్థం చేసుకుని బుజ్జగించే మనసు తోడైతే ఇక కావలసినదేమి ఉంటుంది?!
” గోరొంక కెందుకో కొండంత అలక
అలకలో ఏముందో తెలుసుకో చిలకా..” అంటూ సాగే ‘దాగుడుమూతలు’ చిత్రం లోని పాటను చూసేద్దామా..
అనగనగా ఓ గౌరి.. ఆమె మనసు దోచుకున్న ఓ మావ! అంత మనసైనవాడు అలిగేస్తే ఆ చిన్నది ఊరుకుంటుందా? “ముక్కు మీద కోపం నీ మొఖానికే అందం” అంటూ తన ఆటపాటలతో కవ్వించి నవ్విస్తుంది.  అలా సల్లాపాలాడుతూనే “అడపదడప ఇద్దరూ అలిగితేనే అందం… అలకతీరి కలిసేదే అందమైన బందం” అంటూ మౌలికమైన ప్రేమ సిధ్ధాంతాన్ని కూడా చెప్పేస్తుంది. అల్లరిగోదారిలా పరుగులెడుతూ, కొండపల్లి బొమ్మని గుర్తు చేసే గౌరి ఇంకా ఏమేమంటుందో చూద్దామా..
“అలుక కతమును తెలుపవూ? పలుకరించిన పలుకవూ?
ఏల నాపై కోపమూ ఏమి జరిగెను లోపమూ?”
 అని “పెళ్ళి సంబంధం” చిత్రంలో సుశీల పాడిన ఓ చక్కని గీతం ఉంది. అలుక కు కారణం తెలుసుకునే ప్రయత్నంలో ఈ పాటలో గాయని వేసే ప్రశ్నలు గమ్మత్తుగా ఉంటాయి.. మీరూ వినండి..
ఆ లింక్ లో వినబడకపోతే క్రింద లింక్లో మూడవ పాట:
“సత్యాపతి” అనే లోకనిందను మోసినా, ఆ భామగారి రుసరుసలను, అలుకలను తప్పించుకోవడం కృష్ణపరమాత్ముడికే తప్పలేదు! విరహాన్ని భరించలేక చివరికి..
” అలిగితివా సఖీ ప్రియా అలకమానవా?
ప్రియమారగ నీ దాసుని ఏలజాలవా?..”
అంటూ ప్రియమైన సత్యభామను ప్రసన్నం చేసుకోవడానికి ఎన్ని తంటాలు పడ్డాడో పాపం కృష్ణుడు…!
ఇదే సన్నివేశానికి “శ్రీ కృష్ణతులాభారం” చిత్రంలో సత్యభామాకృష్ణులకు మరో పాట కూడా ఉంది.. “ఓ చెలీ కోపమా.. అంతలో తాపమా…
సఖీ నీవలిగితే నే తాళజాల…” అని! కానీ రెంటిలోనూ “శ్రీకృష్ణార్జున యుధ్ధం” చిత్రం లోని ఈ పాటే నాకు ఎక్కువ నచ్చుతుంది…
అలిగితే అందంగా ఉంటారని ఆడవారిని పొగిడే మగవారే కాదు, అలిగిన భర్తల అందాలను పొగిడే భార్యలు కూడా ఉన్నారండోయ్! అలిగిన భర్తను చిన్ని కృష్ణుడితో పోలుస్తూ, అతడి అందాలను మురిపెంతో భార్య పొగడుతూ ఉంటే.. పైకి బెట్టు చూపిస్తూ లోలోపల మురిసిపోతాడొక పతిదేవుడు. తల్లిలా, అనునయంగా స్తుతిస్తున్న ఆమె ప్రేమకు లొంగిపోక ఏమౌతాడు? గాఢమైన పరస్పరానురాగాలున్న ముచ్చటైన ఆ జంట క్రింది పాటలో…
పిఠాపురం నాగేశ్వరరావు, స్వర్ణలత పాడిన హాస్యభరితమైన యుగళగీతమొకటి “శాంతినివాసం” చిత్రంలో ఉంది. హాస్య నటులు రేలంగి, సురభి బాలసరస్వతి నటించారందులో. అలుక మానమని అతడు, అతడ్ని నమ్మనంటూ ఆ చిన్నదీ దాగుడుమూతలు ఆడుతూ పాడతారు.
ఈ సరదా పాటని క్రింద లింక్లో చూడండి..
“జల్సారాయుడు” సిన్మా లో పిఠాపురం నాగేశ్వరరావు, జిక్కీ పాడిన మరొక సరదా పాట ఉంది.
“అరెరెరె…తెచ్చితిని ప్రేమ కానుక
అలుక ఎందుకే? అది నీ కోసమే…
అమ్మగారు అలిగినా భలే వేడుక.. ” అని అబ్బాయి అంటే,
నీవెవరివో నేనెవరో… నీ మాయ మాటలు నేను నమ్మను.. అని అమ్మాయి అంటుంది. అమ్మాయిని నమ్మించాలనే తాపత్రయంతో అబ్బాయి, అతని మాటలన్నీ తోసిపుచ్చుతూ అమ్మాయి మాటలతో బాగానే షటిల్ ఆడుకుంటారు. ఆరుద్ర రచన ఎంత బాగుందో అనిపిస్తుంది పాట వింటుంటే..!
క్రింద లింక్ లో రెండవ పాట:
“కంటి కబురూ పంపలేను
ఇంటి గడప దాటలేను
అ దోర నవ్వు దాచకే
నా నేరమింక ఎంచకే..
అలకపానుపు ఎక్కనేల చిలిపి గోరింక.. అలక చాలింక! “
అంటున్న ఓ అమ్మాయి నిస్సహాయపు నివేదన విని మనసు ఆర్ద్రంగా మారిపోతుంది..!
జంధ్యాల తీసిన “శ్రీవారి శోభనం” చిత్రంలో ఎస్.జానకి పాడిన ఓ అపురూపమైన గీతం లోవీ వాక్యాలు. ఓ ముసలావిడగా, ఆమె మనవరాలుగా ఇద్దరి అనుకరణా తానే చేస్తూ ఎస్.జానకి పాడే ఈ పాట గాయనిగా ఆవిడ చేసిన ఓ గొప్ప ప్రయోగమే అనాలి! మేడ పైనున్న ప్రియుడిని ఉద్దేశిస్తూ మనవరాలు పాడితే, శీతాకాలపు చలికి వణుకుతూ ముసలావిడ కూడా తన గొంతు కలుపుతుంది. చిత్రకథ తెలీకపోయినా పాట చూస్తూంటే ఆ అమ్మాయి తెగువకూ, ధైర్యానికీ ఆశ్చర్యం కలిగి, మేడపైనున్నతడు అలక చాలించి ఆమె ప్రేమను స్వీకరిస్తే బాగుండునని కోరుకుంటాం మనం కూడా. తాను స్వరపరిచిన ఏ పాటతోనైనా మనకు అంతటి దగ్గరితనాన్ని ఇచ్చే మహత్తు రమేష్ నాయుడు బాణీలకు ఉంది మరి!
ప్రేమికుల అలకలు తీరాకా కూడా చెప్పుకునే ఊసులు కొన్నుంటాయి. ఏవో కథలు, గాధలూ, వలపులూ, మాధుర్యాలు అంటూ ఈ ప్రేమికులు పరవశులై ఏమని పాడుకుంటున్నారో క్రింద పాటలో విందామేం..
‘మానాన్న నిర్దోషి’ చిత్రం లో పాట ఇది..
“అలకలు తీరిన కన్నులు ఏమనె ప్రియా
అల్లరి చూపుల పల్లవి పాడెను ప్రియా”
(అలకలు తీరాయిగా! మరో నేపథ్యంతో మరోసారి మళ్ళీ కలుద్దాం…)

– తృష్ణ

raji

Download PDF

4 Comments

  • వేణూశ్రీకాంత్ says:

    బాగుందండీ కానీ ఈ సారి మరీ కొన్నే పాటలు తెచ్చినట్లున్నారు :-)

    • @వేణు శ్రీకాంత్: మరీ పాత పాటలు తెలియట్లేదంటున్నారండి మిత్రులు… అందుకని జాబితా తగ్గిపోయింది..
      ధన్యవాదాలు.

  • sreedevi says:

    తృష్ణ గారూ,
    మీరు అందిస్తున్న ఈ సిరీస్ చాలా బాగుంటోంది. మీరు ఎంచుకొనే టాపిక్కూ, పాటలూ మనసును చాలా ఆహ్లాద పరిచేవిగా వుంటాయి .
    వాటిని పరిచయం చేసే తీరు కూడా వాటికి తగినట్లుగానే మనసును సుతిమెత్తగా తాకుతున్నట్లుగా వుంటుంది.
    పాపులర్ గీతాలు మాత్రమే కాకుండా మరుగునపడ్డ ఆణిముత్యాలను కూడా అందిస్తున్నందుకు చాలా థాంక్స్ .

Leave a Reply to తృష్ణ Cancel reply

Your email address will not be published. Required fields are marked *

Enable Google Transliteration.(To type in English, press Ctrl+g)